ميكروجرين الفجل
البوست دا عن زراعة ميكروجرين الفجل بكل التفاصيل
في التجربة دي هنستخدم طبق بلاستيك (زي اللي بييجوا لما تشتروا كنافة ولا أي حاجة حلوة من أي محل حلويات)
فممكن تستغلوا أي علبة بلاستيك موجودة في البيت زي دي أو أصغر كمان في زراعة ميكروجرين الفجل
أول حاجة خرمت شوية أخرام في الطبق من تحت لتصريف المية الزيادة في التربة
نوع التربة في التجربة دي هو الپيتموس وحطيت الطبق جوة كيس علشان المية الزيادة تنزل فيه وممكن إستخدام صينية أو طبق أكبر بدل الكيس
بالنسبة للبذور دي فلقيتها عند العطار بالصدفة وحبيت أجربها وأظن إنه فجل أحمر وأتكلمت معاه شوية إني هجرب أزرعهم وقالي إنه يتوقع نسبة إنبات ضعيفة (20%) بس أنا قولتله أظن أعلى من كدة
رشيت التربة بمية كويس وحطيت البذور وحاولت أوزعهم بشكل كويس وضغطت عليهم براحة بغططا بركمان علشان يكونوا لامسين سطح التربة بشكل كويس
نصيحة خاصة بحجم البذور في زراعة الميكروجرينز
لما بتكون الحبوب حجمها صغير بيكون من السهل إن الواحد يحط منها كتير فخلوا بالكم من إنكم تحطوا حبوب كتيرة زيادة عن اللزوم ووزعوهم كويس
توضيح للتغييرات في تجربة زراعة ميكروجرين الفجل
التجربة دي حبيت أجرب فيها حاجة مختلفة وهي إني محطش أي غطا فوق البذور علشان أشوف نتيجة دا
علشان نضمن إنبات متساوي المفروض بنحط حاجة فوق البذور علشان مستوى الرطوبة يفضل عالي فالبذور معظمها تنبت في وقت واحد
فالنتيجة كانت إن الإنبات فعلاً مكانش متساوي بس في أخر أيام التجربة كله أتزبط
جدول الري لميكروجرين الفجل
من اليوم الأول لليوم الرابع رش ببخاخة المية من 3 لـ 4 مرات على مدار اليوم
من اليوم الخامس لليوم العاشر ري Bottom Watering مرة بليل في اليوم
توضيح بخصوص حصاد ميكروجرين الفجل
بداية من اليوم الخامس ممكن تاكلوا من ميكروجرين الفجل, الطعم بيختلف بمرور الأيام
في اليوم الخامس الطعم حدته بتبقى قوية وسبايسي وا بيقل بمرور الأيام ولكن حتى في اليوم العاشر كان الطعم فيه kick كدة لطيفة
تطور زراعة ميكروجرين الفجل يوم بيوم
اليوم الأول
الجذور بدأت تظهر
اليوم التاني
تطور الجذور بشكل ملحوظ
اليوم التالت
ظهور بعض الإنباتات
اليوم الرابع
زيادة معدل الإنبات
اليوم الخامس
حطيت الطبق تحت الإضاءة الصناعية
دوقتها لأول مرة وطعمها فجل (أكيد يعني بس مكنتش متوقع الدرجة) وفيه kick كدة
اليوم السادس
الأرضية مليانة بذور منبتة متأخر بس لسة متطورتش الساق
اليوم السابع
الإضائة الصناعية ساعدت الفجل جداً في النمو بالشكل دا
اليوم التامن
تطور ملحوظ في لون الأوراق
اليوم التاسع
أخر يوم قبل الحصاد
اليوم العاشر
يوم الحصاد
بعد قص ميجروجرين الفجل من الطبق
إجمالي اللي قصيته من طبق ميكروجرين الفجل 143 جرام
كل علبة حطيت فيها 50 جرام ميكروجرين الفجل
النتيجة
التجربة في المجمل كانت سهلة مقارنة بميكروجرين عباد الشمس
الفجل من الميكروجرينز اللي مش لازم تتزرع في صينية كبيرة لو لإستخدام شخصي
علبة بالحجم دا او أصغر تطلع كمية لطيفة
مش بالضرورة تحصد كله مرة واحدة في اليوم العاشر
ممكن من اول اليوم الخامس تقص اللي حابب تاكله كل يوم
حلو اوي ماشاء الله
ردحذفهو انا ممكن احط العلبة جنب شباك بدل الاضاءه الصناعية؟ مش هيوصل له شمس ضوء طبيعي بس