ميكروجرين عباد الشمس
بقالي فترة بقرأعن الميكروجرينز وإنها مغذية وطعمها حلو في الأكل وحبيت أعمل تجربة موثقة يوم بيوم لزراعتها وحصادها والأدوات اللي ممكن تحتاجوها والمشاكل اللي ممكن تواجهوها
إيه هي الـ Sunflower Microgreens؟
هي نبات عباد الشمس بس بيتم زراعته بشكل كثيف في مساحة صغيرة وحصاده في مرحلة عمرية صغيرة نسبياً (من أول 6 لـ 10 أيام) وطعمها بيكون حلو جداً (عن تجربة)
أول ورقة للنبات (الـ cotyledon leaves) وهي أول حاجة بتظهر لما بنزرع البذرة وأول ما بتوصل لمرحلة معينة بتبتدي الأوراق الحقيقية (True Leaves) للنبات تظهر
وقت الحصاد بيكون قبل ما الأوراق الحقيقية تبدأ تنمو بشكل كبير - الأوراق الحقيقية هي تاني ورقة بتنمو في النبات
(الـ true leaves شكلها بيختلف على حسب النبات وهي الورقة الصغيرة اللي بين الورقتين الصغيرين)
المغذيات في ميكروجرينز عباد الشمس:
غنية بالألياف وفيها فيتامينات ومعادن كتير زي فيتامين A و B و C و D و E ومغنيسيوم وبوتاسيوم وفسفور وبنسبة قليلة زنك ونحاس ومنجنيز و كروم (مصدر المعلومة)
بالنسبة للسعرات الحرارية فكل 90 جرام فيه 25 كالوري (مصدر المعلومة والصورة)
الأدوات الخاصة بزراعة ميكروجريز عباد الشمس
صواني الإنبات بالشكل دا بنكون محتاجين منها 3 على الأقل لأنهم بيكونوا صينية فوق وصينية مخرمة في الوسط وصينية تحت
ملفيتش حد بيبيع الصواني دي غير الصفحة دي صواني شتلات للبيع في مصر وتعاملهم محترم جداً أنصح بيهم
هل معنى كدة إن الصواني دي ضرورية؟ لأ لأن ممكن تستخدموا أي علب بلاستيك عندكم وهتعمل نتيجة بس الصواني دي بتكون أفضل بكتير وبتدي مساحة وفاعلية أفضل وهنشرح إستخدامها
التربة: حالياً بستخدم بيتموس في الزراعة ولكن معظم اللي بيزرعوا بينصحوا بإستخدام الكوكو بيت ولو التجربة نجحت ممكن أجربه
البذور: أنا إشتريتها من مقلاة لب قولتله عايز بذور عباد شمس ني وطبعاً مش أفضل مصدر للبذور بس دا كن لمتاح وببحث عن ناس بتبيع بذور بجودة عالية ومتنوعة حالياً
مضاد الفطريات: مهم جداً نشتري علبة مية أكسجين (تركيز 3%) لأن بنخففها بالمية وبنستخدمها كمضاد للفطريات
بخاخة مية: محتاجين 2 - واحدة هنرش بيها النباتات بالمية وواحدة يكون فيها محلول مضاد الفطريات
زراعة ميكروجرينز عباد الشمس
علشان نعرف محتاجين بذور قد إيه بنحط البذور في صينية فاضية علشان ناخد فكرة إحنا محتاجين قد إيه بالشكل دا
أول حاجة بنحتاج ننقع البذور لمدة 4 - 6 ساعات في المية علشان تبدأ عملية الإنبات (Germination) وأفضل طريقة لقيتها هي إننا نحط البذور والمية في كيس ونفضيه من الهوا بالشكل دا
(نصيحة: نحط نص معلقة مية أكسجين مع مية النقع لأنها بتنفع جداً في مواجهة اي عفن (Mold)
لما بنخلص نقع للبذور بنصفيها وبنجهز الصواني بتاعتنا للزراعة بالشكل التالي
الصينية الأولى بتكون تحت وليها إستخدامين ( بتكون علشان المية متنقطش على الأرض - هنسقي عن طريقها الجذزور في مرحلة متقدمة) ودا شكلها
الصينية التانية بتكون فوق الصينية الأولى (في النص بين الصينية الأولى والصينية التالتة) وبتكون مخرمة علشان تصرف المية الزيادة ولأن الجذور بتخرج منها
وبنحط في الصينية التانية التربة (بيتموس) بالشكل دا وبنراعي إنها تكون متساوية (عمق التربة 2.5 سم) ونضغط عليها ضغطة خفيفة ونحاول نخليها مبلولة شوية
وبنوزع البذور اللي نقعناها على التربة في الصينية التانية بالشكل دا
(ملحوظة من المستقبل - عدد البذور بالشكل دا كان زيادة شوية - حاولوا تكون كل حباية لامسة التربة وميكونش في تكدسات للبذو علشان بتعمل مشاكل)
بنحط الصينية التالتة فوق الصينية التانية ودي بنحط فوقيها وزن
 |
| حطيت قطع من الرخام فوق الصينية التالتة |
ليه بنحط وزن؟
علشان الوزن بيخلي البذور ثابتة في مكانها ولما تبتدي تطلع جذور الجذور دي تحفر أعمق وأعمق في التربة وبيخلي نسبة النمو والطول إلى حد ما متقارب من بعضه
وكدة نكون زرعنا عباد الشمس بتاعنا
جدول الري لميكروجرينز عباد الشمس
- اليوم الأول لليوم الرابع (مرة الصبح ومرة بليل - رش) :
بنشيل الوزن الأول وبعد كدة بنشيل الصينية التالتة (اللي فوق) بنرش البذور ببخاخة المية شوية + بنرش البذور بمحلول مقاومة الفطريات وبنرجع الصينية التالتة وبعد كدة بنحط الوزن تاني
(الترتيب دا علشان الوزن ميبوظش الصينية اللي فوق أو يكسرها)
بنحط كوباية أو كوبايتين مية في الصينية الأولى (اللي تحت خالص) والنبات بيتغذى من جذوره ودا إسمه Bottom Watering
تطور عباد الشمس أثناء الزراعة
اليوم الأول
اليوم التاني
اليوم التالت
اليوم الخامس
اليوم السادس
اليوم السابع
اليوم التامن
اليوم التاسع (أخر يوم)
الحصاد
تعليب وتوزيع ميكروجرينز عباد الشمس
إجمالي اللي قصيته من الصينية كان ٣٣٣ جرام وكان في حوالي ٢٠ جرام شيلتهم قبل الوزن بإجمالي ٣٥٣ جرام
عملت ٤ علب كل علبة ٥٠ جرام ووزعتهم علشان اعرف رأي الناس فيهم
في حالة التعليب بنختار أفضل الميكروجرينز من اللي تم حصاده, يعني مينفعش نحط واحدة فيها إصفرار أو أوراق حقيقية متطورة بزيادة أو أوراقها مقطوعة وللسبب دا الـ 350 جرام علبت منهم 200 جرام فقط
هنتكلم أكتر عن ميكروجرينز عباد الشمس لأني هبدأ قريب في تجربة جديدة بتعديلات أكتر وهنشوف نتيجتها
شكرا للتوضيح لكن هي سؤالين الاول ح نشيل الغطاء والرخام امتي؟ الثاني سعر البيع ل٥٠ جرام كام ؟؟؟
ردحذفو ماهو رأى الناس ؟
ردحذف