6 حلول لمشكلة العفن في زراعة الميكروجرينز
كنا إتكلمنا عن زراعة ميكروجرين عباد الشمس قبل كدة وإتكلمنا عن إن واحدة من المشاكل اللي بتواجه أي حد بيزرع ميكروجرينز عامة هي مشكلة العفن وبتكون أقوى بشكل خاص في ميكروجرينز عباد الشمس
إيه هو العفن ؟
العفن بيكون فطريات بتظهر بسبب ظروف معينة على شكل خيوط أو رغوة وبتكون علامة من علامات التحلل والفساد
إيه هي مسببات ظهور العفن؟
الرطوبة العالية - التهوية السيئة - الأماكن المغلقة - التحلل للمواد الطبيعية - تصريف المية السيء
إيه هي مسببات ظهور العفن أثناء زراعة الميكروجرينز؟
طريقة زراعة الميكروجرينز فيها معظم الأسباب الرئيسية لظهور العفن اللي قولناها في السؤال اللي فات
- بنحط تربة مبلولة والبذور بتكون منقوعة ومبلولة وبنرش البذور دي بمية كل يوم فمستوى الرطوبة بيكون عالي جداً
- بنحط فوق البذور صينية عليها تقل اول 3-4 أيام وبنقلب الصينية دي لمدة من يوم لـ 3 أيام علشان نبدأ مرحلة الإظلام فبتكون التهوية سيئة والرطوبة عالية وتعتبر وسط مغلق
- تحلل المواد الطبيعية في التربة المبلولة بتاعتنا برضو بيؤدي للعفن
- تكدس البذور زيادة عن اللزوم بيتسبب في زيادة الرطوبة وسوء التهوية
- تراكم المية لفترات طويلة في التربة وعدم تصريفها
أضرار العفن في زراعة الميكروجرينز
العفن ممكن يتسبب في أضرار كبيرة في زراعة الميكروجرينز
ممكن يتسبب في بطء نمو الميكروجرينز بتاعتك لأن العفن بينافس الميكروجرينز بتاعتك على المغذيات
ممكن يتسبب في موت جزء من الميكروجرينز بتاعتك لأنه يقدر يقضي على جذر النبات أو ساقه أو أوراقه بالشكل دا
وممكن يتسبب العفن في موت محصول الميكروجرينز بالكامل لو تم إهماله وعدم إتخاذ التصرفات الصحيحة
طرق تقليل إحتمالية وجود العفن في الميكروجرينز ومواجهته
- التهوية الجيدة لمكان زراعة الميكروجرينز
- إختيار نوع التربة المناسب لزراعة الميكروجرينز
- توزيع البذور بشكل مناسب في التربة والبعد عن أي تكتلات للبذور
- عدم الإفراط في ري الميكروجرينز
- التأكد من وجود ثقوب تصريف للمية بشكل مناسب بشكل كافي
- إستخدام مياه الأكسجين في زراعة الميكروجرينز
مياه الأكسجين
هي مركب كيميائي Hydrogen peroxide وتركيبها الكيميائي H2O2 وبتستخدم لمواجهة العفن في زراعة الميكروجرينز ومية الأكسجين اللي بنستخدمها بيكون تركيزها 3%
طريقة إستخدام مياه الأكسجين في زراعة الميكروجرينز
- في حالة نقع البذور (خاصة عباد الشمس) بنضيف نص معلقة صغيرة (معلقة الشاي) للمية ودا بيقلل نسبة التعفن بدرجة كبيرة
- بنعمل محلول للرش بشكل خفيف على الميكروجرينز في الفترة الأولى من الزراعة (لحد نهاية فترة الري بالرش)
يعني بنرش البذور بتاعتنا بمية عادية وبعدها بنرش رش خفيف بالبخاخة للمحلول
العلبة بيكون فيها حوالي 80 مل من مياه الأكسجين وعلشان نعمل المحلول بيكون لكل علبة مية أكسجين بنزود عليها 240 مل مياة عادية وبنحطهم في بخاخة
ولو إتبعنا الخطوات دي مش هتواجهنا أي مشكلة مع العفن في زراعة الميكروجرينز
تعليقات
إرسال تعليق