أهمية الإضاءة في زراعة الميكروجرين
الإضاءة واحدة من أهم العوامل في زراعة الميكروجرينز وبتعمل فرق كبير جداً
الضوء والميكروجرينز
الميكروجرينز بعد مرحلة الإنبات (Germination) ومرحلة الإظلام (Blackout) بيكون لونها أصفر لأنها محرومة من الضوء وبتحتاج تكون تحت ضوء مناسب لحد وقت الحصاد علشان تخضر وتنمو شوية وتتطور الورقة الأولى( The Cotyledons) كفاية
فبما إن الهدف الأهم في زراعة الميكروجرينز هو أول ورقة (Vegetation) فأهم حاجة إن الضوء يحفز نموها
الضوء زي ما إحنا عارفين هو كذا لون مع بعض وفي ألوان معينة بتحفز حاجات معينة في النباتات بمعنى:
- اللون الأزرق في طيف الضوء بيشجع الأوراق والنباتات على النمو (Vegetation) أكتر
- اللون الأحمر في طيف الضوء بيشجع النباتات على الإزهار (Flowering) أكتر
علشان كدة بنحتاج ضوء فيه نسبة اللون الأزرق أعلى علشان تشجع الميكروجرينز في تطوير الورقة الأولى بشكل كبير
الشمس و زراعة الميكروجرينز
لما بتيجي سيرة الإضاءة والزراعة سوا كل الناس بييجي في بالها الشمس كمصدر ضوء أساسي وطبعاً الشمس مصدر ضوء متكامل ورائع جداً بس مشكلته الوحيدة في زراعة الميكروجرين هي الحرارة اللي بتكون معاه خاصة في مصر
عيب إستخدام ضوء الشمس في زراعة الميكروجرينز
درجة الحرارة العالية لأنها ممكن تتسبب في:
- جفاف النباتات بشكل كبير لأن الحرارة المثالية لزراعة الميروجرينز بتكون حوالي 21 درجة سلزيوس
- تسريع نمو النباتات عن المعدل الطبيعي للميكروجرينز فتظهر الأوراق الحقيقية في وقت أسرع من العادي
- الري زيادة عن اللازم لمحاولة مواجهة الجفاف واللي بينتج عنه عفن للجذور
ولكن ميزة ضوء الشمس إنه مجاني وقوي جداً ومتوفر لحد حابب يجرب على scale صغير
الأضواء الصناعية و زراعة الميكروجرينز
الميكروجرينز بتحتاج إضاءة بيكون نسبة اللون الأزرق فيها أقوى علشان تشجع على الـ Vegetation زي ما وضحنا فوق
مميزات إستخدام الأضواء الصناعية:
- تقدر تتحكم في عدد ساعات تعرض الميكروجرينز للضوء
- مفيش حرارة مصاحبة للضوء الصناعي فمش هيتسبب في مشاكل خاصة بالجفاف أو العفن
- ممكن تتحكم في قرب وبعد مصدر الضوء للتعويض عن فرق قوة الضوء الطبيعي عن ضوء الشمس
العيب الوحيد هو إستهلاك الكهربا وسعرها (على حسب نوع الإضائة وقوتها وسعر الكهربا)
وبالتالي معظم اللي بيزرعوا الميكروجرينز بيزرعوها في مخزن\شقة مثلاً علشان يقدروا يتحكموا في البيئة المحيطة وبيستخدموا الأضواء الصناعية بديلاً لضوء الشمس
الضوء اللي بتحتاجه الميكروجرينز بيكون حوالي 2000 لومن ودا سهل يتم تحقيقه بلمبات الـ Fluorescent أو لمبات الـ LED المناسبة
هعمل بوست كامل عن طريقة عمل وحدة إضاءة مناسبة للميكروجرينز بسعر مناسب قريب
تعليقات
إرسال تعليق